جائنى الباشمهندس جميل شاردا عابثا على غير العاده , فهو شاب وسيم دائم الإبتسامه مجدا فى عمله يحبه الجميع فى بلدته وفى عمله فبادرته بالسؤال :
خير يا باشمهندس , حصل حاجه كفالنا الشر ؟؟!! أيه الحكايه مال شكلك غضبان جدا , حصل حاجه فى البيت ؟؟ الأولاد كويسين ؟؟
جميل : الأولاد كويسين الحمد لله بس أنا تعبت مش قادر .
وجيه : خير صحتك كويسه ولا كريزه القلب بتجيلك ؟؟
جميل : لأ يا عم القلب مستقر دلوقتى والحمد لله , أنا مش قادر أعيش فى البلد دى , شوف لى طريقه عايز أسيب مصر , تعبت كفايه كده.
وجيه : هدى أعصابك كده وروق , أيه الحكايه ؟؟ أجيب لك شاى ولا كوكاكولا .
جميل : ايه الحكايه يادكتور إن ماكنتش دكتورى وبتعالجنى يعنى ما انت عارف انى عندى قصور فى الشريان وعندى المعده وعلشان كده ماباشربش الحاجات دى لإنها بتتعبنى .
وجيه : طيب خلاص هاجيبلك ينسون , أهه منه فوايد كتير منه كويس للمعده ومنه تنسى ؟؟.
جميل : أنسى أيه يادكتور , معلهش ماليش نفس فى حاجه , أعفينى.
وجيه : بالراحه كده , أحكى لى كل مشكله ولها حلال .
جميل :تعبت فى الشغل بيتلككو على كل كلمه باقولها وبيحوروها وبيحاولو يثبتو ليا وللكل إنى طائفى ومتعصب .
وجيه : متعصب أيه ده أنت متربى وسط المسلمين وكل جيرانك مسلمين وإصحابك وحبايبك اغلبهم مسلمين , تيجى منين طائفى دى .
جميل : شوف يا دكتور انت تعرفنى من واحنا صغيرين عمرك شفتنى بانافق حد أو بداهن لحد .
وجيه : أه , مشكلتك الوحيده , عارفها بتقول للأعور أنت أعور فى عينه بدون ماتاخد لبالك .
جميل : لأ انا واخد لبالى بس انا اتعودت اللى فى قلبى على لسانى وده اللى تاعبنى .
وجيه : أيه المشكله بقى ؟؟
جميل : شوف فى الشغل عندى بالرغم من إنى واخد قرار عمل خفيف من لجنه ثلاثيه طبيه علشان عندى قصور فى القلب إلا أن جهه عملى لم تعترف بهذا القرار بل على العكس بتسند لى أعمال أكتر من باقى زملائى , ده مش كده وبس ده أحيانا صغار الموظفين يتغيبوا وبيضطرونى أقوم بعملهم كمان دون محاسبه للمقصرين من صغار الموظفين .
وجيه : طب لما معاك قرار عمل خفيف ليه مابيعملوش بيه ؟؟
جميل : علشان شكلى ويمكن علشان حاجه تانيه ..
وجيه : شكلك ديت إحنا عارفينها طول عمرك حيطه واقفه مايبانش عليها المرض .
جميل : يعنى يا دكتور عايزنى اتسند على الحيطان علشان يعرفو إنى عيان ,ده مش طبعى وضد كبريائى .
وجيه : فهمت , لكن أنت بتقوم بالعمل الزايد ده مجبر , يعنى غصب عنك ؟؟
جميل : لأ محبه , وأنا فيه بينى وبين المدير علاقه محبه وموده فهو صديقى وأنا بأعتز بيه وهوه إنسان محترم وكمان علشان مايزعلوش منى زمايلى .
وجيه : طيب فين المشكله مالأمور ماشيه كويس بناء على رضاك , فين المشكله بقى ؟؟
جميل :المشكله يا سيدى فى الإداره , يعنى الإداره لو عايزه تعمل حاجه أو عايزه تدينا جزاءات توفر على نفسها ده وتبعت لأحد المفتشين الأداريين علشان يفتش علينا ويدينا جزاءات ولما نكلم الأداره تعمل نفسها حمل وديع ومالهاش دخل بده .
وجيه : إزاى يعنى مش فاهم ؟؟
جميل : أقولك , المدير متفق معانا كلنا إن دفتر الحضور الصبح هيتشال الساعه تسعه وربع والإنصراف الساعه واحده وكلنا ماشيين على ده .
وجيه : كده كويس , فين المشكله ؟؟
جميل : اصبر عليا أنا جايلك فى الكلام ...
وجيه : ماشى .
جميل : ييجى عمك المفتش الإدارى الصبح الساعه تمانيه ونص ويشطب علينا بحجه مافيش إمضاء بعد تمانيه ونص .
وجيه : خلاص , تيجو قبل تمانيه ونص علشان تضيعو الفرصه عليه .
جميل : ده اللى عملناه وأنتظمنا على كده .
وجيه : كويس , وبعدين ؟؟
جميل :جالنا فى الأنصراف يشطب على اللى مش لاقيهم بعد الساعه واحده ويكتب فينا مزكرات ناخد فيها جزى .
وجيه : خلاص يبقى تنصرفوا الساعه أتنين علشان تضيعو عليه الفرصه .
جميل : عملنا كده راح عمل مرور أثناء اليوم علشان يغيب الناس ويديها جزى .
وجيه : طب أنت أيه اللى مزعلك فى القصه دى .
جميل : اقول لك , يعنى عيب قوى لما يبقى التشطيب على ناس ناس وفيه ناس مايتشطبش عليها خالص وهيه مش منتظمه فى العمل وأصغر منينا سنا ودرجه .وجيه : آه قولتلى يعنى خيار وفاقوس .
جميل : بالضبط كده وبعدين تحريت هو المفتش الإدارى ده ليه يوميا فى المستشفى ومن أمتى المفتش الإدارى يبقى كل يوم عندينا ويعمل مابداله , وعرفت من مصادر موثقه أنه بيعمل كده علشان يذود دخل صندوق الجزآت فى الإداره اللى بيطلعو بيه رحلات دينيه زى العمره وكده .
وجيه : يا خبر , أوعى تكون قلت لهم كده ؟
جميل : ده اللى حصل فى إجتماع مع المديرين وفى وجود بقيه المهندسين قلت للمدير : المفتش الأدارى بيدى الجزاءات دى علشان يذود الفلوس فى صندوق الجزاءات علشان رحلات العمره وأحنا مالناش إعتراض على ده لكن إعتراضنا إنه لو عايز يدى جزاءات فيدى الناس المتسيبه اللى ما بتأديش عملها فعلا , مش يدى الناس الملتزمه والناس المتسيبه حمايه خاصه .
وجيه : طبعا سابو الموضوع ومسكوا لك فى كلمه العمره اللى انت قلتها !
جميل : هو ده اللى حصل وعينك ماتشوف إلا النور : أنت متعصب , أنت عايز تعمل فتنه طائفيه , أحنا هنبلغ عنك .
وجيه : أنت هتقول لى , ولعت طبعا !
جميل : أنا قلتلهم , إزاى طائفيه أنا باتكلم بوجه عام يعنى زى مافيه بعض الأقباط اتضررو من الجزاءات فيه بعض المسلمين اللى برضه انضروا وانا باتكلم عن الصالح العام .
وجيه : آه بس أنت جبت سيره العمره وهنا أعتبروها إهانه .
جميل : إهانه ليه , طب ماهما عارفين إن ده بيحصل و هنكدب على بعض يعنى , طب أيه رايك إن اللى قالى على حكايه إن فلوس الجزاءات دى بتتلم وتذهب فى موضوع العمره , صديق ليا موظف فى الإداره وهو مسلم الديانه .
وجيه : آه هما عارفين , لكن أنت تقول , يفتح الله , المهم , هو يعنى المفتش الأدارى ده داخل فيكم شمال ليه , هو عزوه ولا حاجه .
جميل : جيت لمربط الفرس , هو موظف عادى بدبلوم وزاكر وكمل بكالريوس فأنتقل من الأرشيف إلى رتبه التفتيش الإدارى فعلشان كده عنده إحساس بالنقص من المهندسين وعايز يطلع مركبات النقص عليهم , كمان له قريب عضو مجلس شورى بيستقوى بيه بالأضافه إلا انه بالرغم إنه مفتش إدارى إلا أنه عنده منصب فى الحزب الوطنى مستقوى بيه برضه .
وجيه : مستقوى بالحزب ,آه , قلتلى .
جميل : طب وأيه يعنى ما أنا عضو فى الحزب الوطنى بس عيبى إنى أربعه ريشه .
وجيه :موضوعك بسيط ومافيهوش مشاكل ويتحل بالحكمه .
جميل : ياعم إتحل إتحل ماتحلش عنه ماإتحل , شوف لى يا عم طلعه بره البلد دى .
وجيه : قوم الأول أطمن عليك واشوف لك الضغط , أكيد مرتفع .
وهنا سرحت بخاطرى لإمتى هنفضل محلك سر ولأمتى هنخرج بره المواضيع الأساسيه ونمسك فى مواضيع فرديه ,
وأمتى هنفوق وتبقى قوانين العمل ساريه على الكل وأمتى هنطلع من الخيبه اللى إحنا فيها , دى مابقتش خيبه بس , دى بقت خيبه بالويبه .
د / وجيه رؤوف .
ليست هناك تعليقات:
إرسال تعليق