نعم للكوته والتمييز الأيجابى للأقباط
حقيقه اندهش كثيرا هذه الأيام ممن يخرجون علينا بروائع الكلام من ان الأقباط ليسوا اقليه وأنه من العار على الأقباط المطالبه بالكوته فهم نسيج اصيل من الشعب لايجب التفريق بينه وبين الآخرين ,
والحقيقه الكلام شكله جميل ولكنه كلام أأقرع خالى من الحقيقه ولكن من الممكن بهذا الكلام الضحك على الغلابه البسطاء اللذين لايعرفون دهاليز السياسه وسم الأفاعى ,
أما عن قول البعض بأننا لسنا أقليه نعم نحن لسنا اقليه طيب ياريت تعلن لى تعداد اقباط مصر كام اللى يعتبر كأنه من الأسرار العسكريه لايجب الكلام فيه , أما عن كوننا اقليه فياريت نحصل الأقليه أو أأقل من الأقليه ده أحنا حقوقنا مهضومه سياسيا تماما واللى يقول غير كده يبقى كداب ومنافق ,
أما اللى يخرج علينا ويقول لنا قدامكم الأنتخابات الحره النزيهه أدخلوها وانتوا تعدوا فيها فمعلهش ده كان زمان قبل العقول والقلوب ما تتسمم ويعبوها سموم زى ( لا ولايه لقبطى على مسلم فبالتالى أنسىىىىىىىىىىىىى حضرتك حكايه الأنتخابات الحره النزيهه ) ده حتى أخواتنا المسلمين فى الوطن بينجحوا بالدراع وضرب الرشاشات احيانا وكثيرا منهم بالتزوير تقوم تقولى انتخابات حره نزيهه .... اسف ده فى المشمش سعادتك
ولك ان تتامل اعضاء المجلس بيتناقشوا مع بعض اذاى علشان تعرف انتخاباتنا الحره النزيهه بتجيب مين للكرسى فى سيد قراره ........حاجه تكسف !!
تيجى بقى لموضوع الكوته والله من العار ان تناقش كوته المرأه قبل ان تناقش كوته الأقباط , ليه بقى ؟؟ طقطقوا ودانكم معايا :
طبعا سياستنا الحاليه بتحاول تقوض دور المحظوره فى الأنتشار حتى لاتستطيع الوثوب الى سده الحكم فهل عمل كوته للمرأه سيضمن لها ذلك بالطبع لا , لأن المحظوره تستطيع ان تدفع بالمرأه من كوادرها للأنتخابات وبكده العمليه هى هيه وكأنك يا ابو زيد ما غزيت , معلهش ماهو الساسه برضه بتغيب عنهم حاجات !!
اما عن الأقباط فمن حقهم (الكوته والتمييز الأيجابى مع الأنتخابات بالقائمه النسبيه )وده ييجى ازاى فمثلا لو اعتبرنا ان المطلوب لمجلس الشعب مائه قبطى مكون من رجال ونساء أقباط وده ينزل على قوائم نسبيه لمختلف الأحزاب وبعد النتيجه تناظر نسبه الأقباط الناجحين فأن لم تصل مثلا للمائه كمثال يتم تعيين باقى العدد من قبل رئاسه الجمهوريه ,,,,, كده يبقى الكلام فى الصح ,
أما عن المرشحين الأقباط يا عينى فهم غلابه ليس لهم فى شراء الأصواط أو شراء الزمم أو تهريب الأثار وخلافه حتى يستطيعوا الصرف على الدعايات الأنتخابيه وشراء زمم وضمائر الناس ,
أعتقد لو أن الدوله تريد حقا اعطاء الأقباط حقوقهم السياسيه أو تريد عمل توازن سياسى على ارض الواقع فما عليها الا تطبيق مشروع الكوته والتمييز الأيجابى والأنتخابات عن طريق القائمه النسبيه ,
وياريت مايخرجوش علينا شويه اليهوزات بتوع الأقباط ويقولوا :
لأ أحنا ما نقبلش الكوته ده عار علينا
علشان الكلام ده كلام خايب وما بيقدمش ولا بيأخر
وعلشان الأقباط ماعادوش ياكلوا من الكلام المعسول ده بعد ماشافوا حقوقهم وهيبتهم بتتحطم نظرا لعدم وجود من يدافع عنهم ,
أتمنى رسالتى تكون وصلت
وياريت الواحد مايسمعش تعليقات من اليهوذات اللى يحرقوا الدم
دمتم فى سلامه ألله
د / وجيه رؤوف
ليست هناك تعليقات:
إرسال تعليق