(نصره مصر )
طول عمرى عايش يا مصر فى خيرك
لا فى يوم سبتك ولا رحت لغيرك
عايش مستور وشاكر ربنا , كتر خيرك
ولوكنت مهموم كفايه نظره على نيلك
يعدى اليوم, تعدى السنه دفيان بشمسك
ولو فى يوم ضلمت, هاستنى فى يوم فجرك
عصور الظلم يا مصر يا مادارت فى ديارك
فرس ومغول وتتار وعمر العدو ما هزمك
وكل ملك ظالم حكم ,قتل شبابك, نهبك
كانوا فاكرينها نهايتك لكنها كانت بدايتك
قدرك فى السما محفوظ لايمكن ينطفى نجمك
هانوكى,عروكى,سحلوكى لكن ما ملكوا عزمك
قلبك على اولادك وبتنوحى وبتنزفى من قلبك
عمرك يا مصر مانسيتى دم الشهيد على أرضك
يروح زمان ييجى زمان ,تاخدى تار من حبك
آه يا مصر يا قويه يا شايله الحمل مين قدك
دول قويه ,دول عفيه تلف عليكى وتحايلك
بفلوسها بغازها بسلاحها تحتال عليكى وتغازلك
أه عليك يا عروسه يا فتيه يا شايله العفه فى جبينك
كنوز الدنيا تحتيكى وتاج العز أكليلك
أملنا فيكى يا مصر كبير تقومى تحاسبى من خانك
تاخديلنا بتار شبابك وتحاسبى كل من ظلمك
أمانه عليكى يا اما ماتبكى ولا تزيدى من همك
شمس النهاربكره تنورنا ,تهنينا وتسعدنا بنصرك
تفرح أرواح شهدائنا ومن سابع سما تدعيلك
منصوره دايما يا مصر وتاج النصر أكليلك
د/ وجيه رؤوف
ليست هناك تعليقات:
إرسال تعليق